半支酒
by UmeshuTinShing
二十出頭時，我同澤明係同事，番嘅係中環甲級寫字樓，職位係部門二打六，活在食物鏈最底層，免強都算係中環白領
唯一生趣就係蛇王時間，澤明唔係打機，而係寫小說。原來大學時期佢已經開始寫長篇故事，喺自己blog連載。澤明向我解釋佢新作入面，利用海底隧道做背景嘅科幻故事，啲人通過隧道，會去到另一個時空嘅香港，有另一個身份…佢講到繪形繪聲時，我見到佢眼入面係有火嘅。佢打算出版小說，然後向電影公司敲門，希望三十歲前可以拍到戲，做導演
聽到呢度，我都深受感動，於是我都向澤明坦白咗自己嘅大計，我要三十歲前升到經理，呢度只係我嘅踏腳石
我地唔知明年會點，但我地都好有自信，明年我地一定會好過今年！
不過事情並唔係想像中容易，磋砣咗幾年，我地先各自離職，搵到新發展
大家仍會間中相約見面，澤明喺做導演路上，載浮載沉，後來Blog 都被 IG 所取代，澤明嘅創作平台搬完又搬，最後都無再更新
一年前，幾個舊同事相約喺我屋企飯聚，差不多四十嘅澤明，喺電視台做編導拍遊戲節目，我就咬緊牙關終於成立咗自己公司
果晚，我開咗支酒，同澤明望住窗外夜空，回味當年一齊研究小說嘅日子，傾吓傾吓，就咁就飲咗半支酒
一直想同佢飲埋剩低嘅半支酒，但一等就係一年
直到今日收到佢嘅短訊。原來佢幾個月前已經係群組講過會去曼徹斯特，仲講笑話要考番個教練牌，帶曼聯攞英超！只係我忙到睇漏眼，仲mute埋個谷
望住架上面嘅半支酒，我諗起澤明果部仲未面世嘅「科幻香港」，想話佢知，咁多年嚟，我個腦已經有晒畫面啦，仲等緊佢將我幻想嘅畫面拍出嚟
我開咗果半支酒，準備今晚飲埋佢，陪住喺半空，飛緊去曼徹斯特嘅澤明
